A liña de axudas para o apoio da actividade comercial en zonas rurais, da Secretaría de Estado de Comercio, inclúese no Compoñente 13 do Plan de Recuperación, Transformación e Resiliencia, “Impulso á Peme", no investimento 4, apoio ao sector do comercio na economía local.

Estas axudas teñen por obxectivo a xeración de emprego e a cohesión social, o financiamento de proxectos de impulso á competitividade, innovación e modernización das canles de distribución en entidades locais de ata 5.000 habitantes, en especial naquelas en zonas máis despoboadas ou con menor densidade de poboación, así como o fomento da actividade e distribución comercial mediante o uso da tecnoloxía, impulsando a transformación dixital.

Estas actuacións permitirán manter unha oferta comercial de calidade, capaz non só de asegurar o abastecemento da poboación, senón tamén de atraer ao consumidor na súa área de influencia creando sinerxías entre municipios, comercios e veciños facilitando o consumo e entrega dos produtos, elementos esenciais para fixar poboación e loitar contra o despoboamento.

Esta liña de axudas contribuirá á consecución do obxectivo CID 212 (Obxectivos da Decisión de Execución do Consello), consistente na finalización de 100 proxectos destinados á modernización da infraestrutura comercial en municipios pequenos.

Gastos subvencionables en apoio ao comercio en zonas rurais

• Gastos dirixidos á transformación dixital. Investimentos para incorporar, manter ou mellorar as funcionalidades da venda do sector comercial, realización de campañas de animación comercial en redes sociais, aplicacións ou webs, así como publicidade, comunicación e visibilidade en diferentes medios ou soportes dixitais.
• Gastos relacionados coa transformación do punto de venda. Investimentos dirixidos á implantación dun novo establecemento comercial ou mellora nun xa existente.
• Gastos relativos á sustentabilidade e a economía circular; investimentos para reducir o consumo de produtos dun só uso por parte do comercio e dos consumidores nos seus establecementos; implementación de solucións tecnolóxicas e investimentos para mellorar a eficiencia no consumo enerxético e noutras subministracións; adquisición de elementos para a correcta reciclaxe dos residuos; así como calquera outras actuacións e solucións dirixidas a incrementar a sustentabilidade, a adaptación ao cambio climático e a eficiencia do modelo de negocio.
• Gastos relativos á cadea de subministración e rastrexabilidade: investimento en proxectos que, mediante a utilización de novas tecnoloxías, xeren redes de subministración e comunicación locais ou de proximidade que involucren á totalidade ou parte dos seguintes actores: comercio minorista, produtores locais e provedores de servizos afíns; dixitalización do rexistro de compras e vendas; tecnoloxías intelixentes de etiquetaxe.
• Gastos de sensibilización e formación. Sensibilización e formación en habilidades, uso e xestión de ferramentas tecnolóxicas no comercio, mercadotecnia dixital, explotación e análise de datos vinculados coa venda en liña, así como para o fomento de estratexias de economía circular, prevención da xeración de residuos, e reutilización de produtos.

Na sede electrónica do Ministerio atópanse os detalles do procedemento.​​